عاجل | هروب قائد كبير يهزّ المليشيا

وصلت أخبار مؤكدة من مصادر موثوقة في الضعين، عن هروب قائد استخبارات مليشيا الدعم السريع، العقيد عيسى بشارة، ومعاه حوالي 11 ضابط من ضباط الجيش التابعين للفرقة 20، والناس كانوا فاكرنهم مختفين وما معروف مصيرهم. الخبر عمل ربكة كبيرة جوّا المليشيا، لدرجة إنّو الدعم السريع ذاته طلع نشرة رسمية تأمر بالقبض على بشارة فوراً.

وبحسب المعلومات الوردت للصحفي الدارفوري خالد التجاني، فالقصة ما كانت هروب عادي… الموضوع اتّضح إنّو في اتفاق تمّ بين بشارة والجيش السوداني، يسمح ليهو يطلع ومعاه الضباط المعتقلين كـ “بادرة حسن نية” منو تجاه القوات المسلحة، والظاهر إنّو الزول ناوي يلتحق بالجيش رسمياً.

قبل يومين، المصباح أبو زيد، قائد فيلق البراء بن مالك، كان لمح في منشور إنو “شخصية كبيرة ومؤثرة وصلت بورتسودان”، بدون ما يذكر اسمها… والآن الصورة بقت أوضح، والناس بدت تربط الكلام ببعضو.

المصادر ذاتها قالت إنّو عيسى بشارة كان صرّح عدة مرات قدّام ضباط ومقاتلين إنّو مليشيا الدعم السريع “بدأت تنهار” في معظم محاور القتال، وحتى في مناطق كان عندها سيطرة فيها. وأضاف إنّو القيادات العسكرية داخل الميدان كلهم شايفين نفس المشهد: انهيار، تشتت، وفقدان السيطرة… بينما السياسيين التابعين للمليشيا – على حد قوله – “بكضبوا على الناس وبدفنوا الحقائق”، وبيجرّوا البسطاء والزول البسيط لأتون حرب خسرانة من بدري.

وبشارة كان واضح في كلامو، وقال أكتر من مرة إنّو الحل الوحيد هو تسليم المتبقي من قوات الدعم السريع للجيش السوداني، ووقف نزيف الدم، وحماية الشباب الساقطين في نار الحرب “حمية ساي” وبلا معنى.