أذكر أيام طفولتنا و صبانا كانت مدني ذاخرة بكبار الإخصائيين ومشاهير الفحيصين و كان مُستشفاها مُستشفاً مرجعياً لا يُشق له غبار وكانت لافتة (عضو الكلية الملكية بآيرلندا)
تُزين مُعظم مداخل عيادات الدكاترة بشارع المستشفى الدكتور صلاح الدين طه جراحاً والدكتور حافظ الشاذلي أطفال و الدكتور أحمد الرشيد الجراحة العامة ومعمل أبو عيسى بشارع المحطة كان الأشهر سُمعةً في السبعينيات القرن الماضي
الدكتور أحمد الرشيد كان رجلاً شايقياً مربوع القامة و موسوماً بشلوخ أهله الشوايقة
فكانت تُحكى عنه طُرفة
وهي أنه ..
ذات مرة جاءته حاجة كبيرة من الشوايقة في العيادة
و يبدو عندما رأت الشلوخ عاودها الحنين و رغبت في المزيد من التعارف
و (طق الحنك)
و تصادف أن إنتظار المرضى بالخارج كان عدداً كبيراً وليس للدكتور وقتاً ليضيعه
فسألته قائلة ..
إنتا يا دكتور من شايقية وين؟
فأجابها وهو يمُد لها الوصفة (الروشتة) ..
من شايقية لندن يا خالة .
تذكرت هذه الطرفة اليوم وأنا أتابع بسعادةٍ (باالغتن) مافعله سودانيو لندن اليوم بالعميل حمدوك و رهطه
زفة من أمها
بل زي البل
ياخ مقطع (الفيديو) الأخير وثق لهروبه جارياً لحظة إخراجة من القاعة تحت حماية الشرطة البريطانية (عليا النعمة) يا جماعة
جرى عديل حتي تم حشره داخل السيارة متبوعاً بلعنات وحناجر الشرفاء والشريفات من أبناء و بنات السودان الوطن الشامخ
أنا اخوك آآ بزرد
بتجري ليه..!
وجاي تحكم منو
وتتحدث بإسم منو
يااا (عشاء البايتات) ؟
وكتين ما قادر تقابل ليه مائة أو مئتي مُحتج على عمالتكم فكيف ستواجه (٤٤) مليون سوداني كلهم ينتظرونكم بفارق الصبر بأرض القصاص العدلي بالسودان
أفوووو جابت ليها
جري عديل كده !!
أظن من المناسب عزيزي القارئ أن ..
(تضحك معاي شويه)
على أحلام الفتى الطائر (حمدوك) في خطابه اليوم بهذه الخُلاصة
فاااا الراجل قال إنو ..
لا يعتقد أن الإطاري هو سبب الحرب
وإنو والله (سياتو) بحث فكرة نشر قوات أممية لحماية المدنيين َمع أطراف إقليمة ودولية !
ولكن السؤال هو كيف سيتم ذلك .
والله يا سيد (حمدكا) أسأل فرحات ود العُمدة يقول ليك !
ثم قال إنو و الله ..
ليس لديه رغبة (أبدّن) بالله شدد ليّ معاك الدال دي كويس وإنتا بتقرأ
ليس لديه رغبة في العودة الى رئاسة الوزراء في السودان وإنو هو آخر من يُفكر في حاجة بالشكل ده .
(لا ياخ حااا توحشنا و حااا تدبرسنا وحااا ننتحر) !!!
وقال..
الحرب الحالية تهدف الى قتل (الثورة) والإجهاز على الإلهام الذي خلقته !!!
يا سلااااام ياخ
قال الإلهام قال
يا جماعة الزول ده شارب شنو
وجاي من ياتو كوكب ياخ
ياسلاااام ياخ سمى
الخمور والمخدرات والعري والتعدى علي حرمات الله ومستشارية النوع ولجنة وجدي شاشات وشلة المزرعة وإهانة الجيش وتمزيق الشرطة وتعطيل القانون والفصل التعسفي ولوحة مايكل أنجلو والقراي ومدني جرادل ونصر الدين مريسة وخالد سلك وبتاع اللساتك وإبراهيم (السيخ) سمى هذه الصفحة السوداء من تاريخ السودان القحطاوي ب الإلهام!!!
إنتو قادرين تتخيلوا معاي مستوى الوهم الغارق فيهو حمدوك وجماعتو؟
بعدين الراجل قال ..
لابد من التفكير في حظر الطيران وتوفير مناطق آمنه وحتي و لو بواسطة تدخل قوات خارجية قال (ماعندو مانع) ويدعو للتفكير في ذلك .
وذكر بعض (الهلاويس) الفارغة التي لا أريد التوقف عندها حرصاً على صحة القارئ الكريم .
شُكْراً
السودانيون ب (لندن) وشكراً شايقية لندن فقد كُنتُم على الموعد
رفع الله أقداركم جميعاً
