سيبدأ اليوم العاشر من ديسمبر الجاري تغيير وإستبدال العُملة القديمة بالجديدة للفئات التي حددها بنك السودان المركزي وذلك في عدد (٦) ولايات هي البحر الأحمر وكسلا والقضارف ونهر النيل و النيل الأزرق و الولاية الشمالية وستنتهي المُدة في الثالث والعشرين من هذا الشهر .
أما الولايات التي لم تشملها الخُطّة فقد أصدر بنك السودان بياناً تطمينياً بأن العملة القديمة ستظل مُبرِّئة للذِّمة لحين صدور قرار آخر لبدء الإستبدال دون أن يُحدد البنك تاريخاً لذلك
*(شُغُل مُعلمين يا عمك)*
على الصعيد الشخصي (العبد لله) مبسوط (خااالس) لهذه الخطوة وإن أتت مُتأخره
فالتوقيت كان مفاجئاً والمُدة قصيرة وهذا ما أحدث إرباكاً وجهجة لدى
(أخوننا الدعامة والحرامية والشفشافة)
*لكن تعال شوف الزردية وين…؟*
الزردية قال ليك في ضرورة فتح الحساب البنكي (أولاً)
طيب فتحناهو يا أستاذ
حا يدوني قروشي الجديدة؟
قال ليك لا لا
ده كلام إنتهى زمان سيتم إيداعهن في حسابك الجديد وتوريهم عرض أكتافك
طيب يا أستاذ ونأكل من وين؟
قال ليك يا سيدي بإمكانك سحب أو تشتري بما يُعادل (٢٠٠) الف يومياً
طيب يا أستاذ أقدار الله والحوجة كان جات بالليل وكان ….
قال ليك تشوف جارك أو سِّيد الدُكان لغاية الصباح
والقصد شنو من الحكاية دي؟
القصد (يا سِّيد اللمنتي ليك) *الكتلة النقدية !!*
تصدق يا مُؤمن عندنا أكثر من (٢)ترليون جنية سوداني لافة خارج النظام المصرفي!
ما بين تخزين و حُفر و سحارات و(مُفحضة) خالتي السرة بت عجبين
وهذه الأموال لازم تدوِّر لدعم عجلة الإقتصاد
بمعنى آخر يا (عب باسط)
حاج أبكر تاجر شطّة زول غنيااان و عندو شوالات من القروش داخل مخزنه وعامل ليها طِبل كبااار لتنوء بالعصبة أولى القوة
قروش جديدة تجرح
لكن شغالة خطين بس
بين مُزارعي الشطة و صغار التجار وحبة بتمشي للسماسرة
فماذا إستفاد الوطن من هذا المخزون النقدي!
لكن تخَيّل معاي لو أن حاج أبكر أودع هذه الأموال داخل البنك
جيت أنا أدوني قضيت غرضي ومشيت
جاء الجزار مشى إشترى بهيمتو وضبح
بتاع الصيدلية إستطاع تأمين الدواء
بتاع طلمبة البنزين
وهكذا …
وياها قروش حاج أبكر ذااتا دوّرت واللاّ لا؟
أفادت الشعب واللاّ لا
حلت مُشكلة كم نفر؟
*أظن الحكاية وضحت يا جماعة*
خلال الأيام القادمة …..
سيلجأ الدعامة والشفشافة للآتي …..
(غسيل الأموال) لكن بطريقة مختلفة (حا) يجيك إنتا يا ولدنا لؤي العاطل عن العمل وكرهان حياتك و يطلب منك أن تودع له مبلغ في حسابك
مقابل (مسحة شنب) أو مسحة شعر لبناتنا الحلوات
أووووعكم ….
من الحاجات دي
ده (حا) يدقسكم و يوكلكم السمسمية
لانك مُجرّد تقيف قدام شباك البنك ويسألوك عن مصدر الأموال
*الساعة ديك*
حيلك بموت وريقك بنشف
وبعداك يحلك (الحله بلّْه)
يعني أفهم من كده يا أستاذ إنو الخطة القادمة هي لتقليل العملة المُتداولة في أضيق نطاق والإستعاضة عن ذلك بالدفع الإلكتروني وعبر التطبيقات البنكية؟
(تماااامن) يا إبني زينا وزي الدول المتقدمة الآخرى
طيب والنشالين يا أستاذ ينشلوا شنو يعني؟
والله ديل يا إبني إلا يبيعوا تسالي !!!
#أفتح_حسابك_وريح_بالك
#جهجهوا_الشفشافة
#أنقذ_إقتصادك
#إتجه_لأقرب_بنك
