بعد رحلة خارجية سبقت تحرير ولاية الجزيرة عاد اليوم رئيس مجلس السيادة (الجنرال) الركن أول البرهان
*حفظهو الله وأبقاهو*
ونكتبها بالواو نشوة وغيظاً لمن طبلوا لفتنة الكنابي
حبايبي الحلوين (القحاطة)
مع كامل التعاطف و تقدير مصيبتكم
لا رفع الله لكم بأرض السودان راية
وجعلكم لمن خلفكم عبرة وآيه
عاد (الجنرال) ليجد نفسه وسط إستقبال شعبي عفوي لم تنظمة مراسم رئاسية ولم تُشرف عليه جهة أمنية بل جاء بقرار الشعب الفخور بجيشه و بقيادته
وكيف لا ….
والجيش السوداني يُبهر العالم بالشغل السمح و الضرب المميّز الذي إستعاد به ولاية الجزيرة شُغُل عُقول وعزائم رجال
وهُنا الفرق ….
بين جيش عريق مُحترف تحكمة التراتبية والطاعة
و بين متفلت نهاب قاطع طريق و مُغتصب
فالقائد موجود أم لا
(أصلااً) مافي مُشكلة
طالما الخُطّة مُتّفق عليها و(العِدّة) لنج
فما الناقص ! (الصُفارة)؟
أم اللجام ؟
فقد قالها الكباشي وسجلتها صفحات التاريخ الناصعة
(فكيناهُ)
بالظلط بالجو بالبحر بالتُرع
فكّيناهُو …..
*الخطوة الأهم برأيي*
هي وبذات العفوية يجب أن يُجمع الشعب السوداني على تفويض الجيش لحكم البلاد بمن يراه مناسباً من كفاءآت هذا الوطن .
كلام أخير و نهائي
ليس بعده أيّاً من أدوات الإستدراك اللغوية
و (واو) الواسطة و (ميم) المحسوبية
والله يا (عب باسط)
المُدة كم؟
رئيس الوزراء منو؟
شكل الحكومة كيف وسنجة كيف؟
دي ما شغلتنا
فهذه كُلّها تُترك لقيادة الجيش
القيادة تدير البلد دي
بمجلس سيادة
مجلس عسكري
مجلس (لوردات)
وزيرة الشباب و الرياضة تكون خالتي السُرّة بت عجبين
ده ما شُغلنا ..!
الذي يهمنا ومن الآخر كده
من يجلس خلف (الدركسون) يكون عسكري
(صارِْي وشُو)
ياخي …..
فترة الرئيس الراحل نميري
مُعظم الورزاء كانوا أعضاء بمجلس قيادة الثورة أو عساكر أعيدوا للخدمة مع (خلطة) كفاءآت مشهود لها داخلية وإقليمياً وعالمياً
(البروف) على شمو
الدكتور جعفر محمد علي
بخيت
(البروف)النذير دفع الله
مولانا عوض الله صالح
البروف عبد الله أحمد عبد الله
وغيرهم و غيرهم
والبلد دي كانت ماشة زي الساعة
أي (سِيك مِيك)
بتسمع إسمك ضمن نشرة الساعة (تلاته)
(تمشي تتم باقي غداك
عند أمك)
مع السلامة
ياخي (حرّرم) ….
النشّال في سوق الله أكبر مسكوه وناس السوق صاحوا أمسكوا الشيوعي
سمع أضاني
بي طول حِسو (كُورك)
ياجماعة أنا والله ما شيوعي أنا حرامي ساكت !!
بلد كانت رغم (البارات) والفرفشة الغلط لكن الوطنية كانت هي المعيار
نريد …..
فترة تخلو (تمامن) من كافة مسميات الماضي الكالحة التي ولّت والى غير رجعة
تنسيقية مش عارف مين
القطاع البتاع العريض
قحط المركزي وقحط الديمقراطي
(أكنسوا هذه المسميات)
ياخي (عليّ الطلاق) نطقها ساكت
يسبب الحموضة و يهيج المُصران
أي زول ……
عندو كلام عن الديموقراطية وكيف يُحكم السودان
وإفلاطون قال
و نهرو قال
وأي زول ماسك ليهو كتاب عاوز يطبقوا فينا من دعاة الوطنية وقيادات الغفلة وبيوتات القداسة المتوارثه
من أولاد المصارين البُيُض
أي زول عندو حاجة بالشكل ده يلِّمها
حتى تتعافى البلد
و يتبلن عروقنا من الموية الباردة
ونشبع ياخي في بطونا ديل
و يلمعن جضيماتنا
بعد (داك) يا سِّيد اللْمنتي ليك أي تاجر سياسة عندو فهم واللْا باقي كلام
يقابل الشعب السوداني في (الرمله الدُقاقا)
الصندوق
نعم صندوق الإنتخابات بس
*درب غيرو تاني مافي*
١٤/جغماير/٢٠٢٥م
